L'exposiziun Caracters unescha ina gruppa voluminusa da lavurs impurtantas da las collecziuns pfofiladas dal Museum d'art dal Grischun e da la chasa d'art da Zug e drizza il Focus sin ina selecziun d'ovras principalas da tuttas duas collecziuns. Questa preschentaziun da las collecziuns stat en ina retscha da differentas cooperaziuns che la chasa d'art da Zug ha organisà ils ultims onns. Ella po vegnir resguardada sco collavuraziun da model da dus museums d'art da la Svizra e maina sur ils cunfins d'ina regiun pli stretga or per activar il potenzial da duas collecziuns publicas creschidas istoricamain per mussar ils cuntrasts e las correspundenzas tranter ellas.

Ina caracteristica da la collecziun dal museum d'art dal Grischun ch'è creschida durant passa tschient onns è l'occupaziun cun la cuntrada. Giovanni Segantini e l'expressiunist Ernst Ludwig Kirchner han tschertgà ed han chattà en il Grischun ina - ord lur vista sco persunas urbanas - cuntrada intacta. Las ovras ch'èn vegnidas stgaffidas là caracteriseschan nossa vista da las Alps fin ussa. L'ovra da Segantini ha influenzà il giuven Giovanni Giacometti e pervia da Kirchner èn ils Basilais Hermann Scherer ed Albert Müller vegnids a Tavau. Lavurs expressivas da Kirchner e d'Egon Schiele da Zug respundan a las gruppas d'ovras concentradas e differenziadas da Cuira. Caracterisads da la cuntrada grischuna eran er Alberto e Diego Giacometti, schebain che tuts dus sa movevan en l'avantgarda da Paris. Partind d'Alberto Giacometti e da la rolla impurtanta dal sculptur austriac Fritz Wotruba en la collecziun da Zug vegn la sculptura ad esser in tema impurtant da l'exposiziun.

Mussads vegnan er artists grischuns contemporans, oravant tut ils fotografs Hans Danuser, Gaudenz Signorell, Guido Baseliga ed Ester Vonplon, ils quals vegnan confruntads cun posiziuns modernas da la collecziun da la chasa d'art da Zug. Sur il dialog da duas collecziuns or ans porscha l'exposiziun Caracters er l'occasiun da reflectar il tractament da collecziuns publicas creschidas istoricamain che dattan ina identitad ensemen cun ils edifizis, en ils quals ellas èn exponidas, e che defineschan l'identitad culturala d'in lieu u d'ina cuntrada. E betg sco ultim po ella vegnir chapida sco in gener d'ina avantpremiera che duai far vegnir mirveglius il public per il nov Museum d'art dal Grischun pli grond.

Avertura 
Vias da la collecziun VI 
Sond, ils 28 da November, a las 17.00, en l'aula da la scola auta da pedagogia da Zug, Zugerbergstrasse 3, 6301 Zug 

Referents
dr. Matthias Haldemann, directur
Barbara Gabrielle, Manadara da la Promoziun da la cultura e delle lingue,
Stephan Kunz, directur dal Museum d'art dal Grischun
dr. Marco Obrist, curatur da la collecziun